Brief we flaszce
Brief we flaszce.
Kebyś dostała brief, naszkryflany.
Dyrgajōncymi dłōniami bazgrany.
Taki pisany na pergaminie.
We flaszce po winie.
Kebyś autora znała nastroje.
Kedy rozwijoł te świynte zwoje.
Kej myśli szukoł we kożdym kroku.
W swoim filŏku.
Z uciechōm patrzoł w ta karta blado.
Widzioł nad kartkōm swoja kochano.
Kedy zalywŏ ôczy płaczkami.
Miyndzy słowami.
Wiedzioł, kaj tyknōm papiōru dłōnie.
Tam tulił czule zdyrgane skrōnie.
Kej w kartce szukoł ust jeji po cichu.
Na kraju brifu.
Zaczōn poleku tak niyporadnie.
Słowa krōnżyły w gowie niyskładnie.
Aż skludziōł cesta we szumne zdania.
Do miłowania.
Zdanie za zdaniym i jeszcze jedno.
Majstry ôd słowa przi tym niych blednōm.
Kuska i liczka wiyndnōm z gorōnca.
Niy widać kōńca.
W tyj chwile cudnyj, tukej sōm sami.
We kożdyj kōmie tak zmiłowani.
We kożdyj kropce i kożdym błyndzie.
Ôna z nim bydzie.
Dych mo głymboki, myśl mu furgała.
W miłosnym szwōngu, kedy dwa ciała.
Pragnōm bliskości, tak ôbudzōne.
Tak rozpolōne.
Jeszcze dwa słowa, niy ôdchodź miyła.
Sōm my we raju, tyś to sprawiyła.
W strzodku Edynu, Boga zagłuszōm.
Pod świyntõm gruszōm.
Kebyś poczuła, co tukej piszã.
Kej bicie serca twojigo słyszã.
Kedy wpisujã ci słowa przŏnia.
Pismym sorōnia.
Czas już podpisać tyn cudny zwōj.
Jeszcze napiszã - na dycki twōj.
Może w Post Scriptum, spōmna twe miano.
Ciebie kochano.
Spōmna ramiōna, dłōnie i brust.
Sztympel przibija ciepłym swych ust.
Aniołōm rykna, wachujcie w niebie
Tyn brief dlŏ Ciebie.
Pôn Bôczku pōmōż, tak ô nij marzi.
U nōg jeji wyciep, na jeji plaży.
Zmysłōw stynskniōnych tyn ckliwy śpiyw.
We flaszce brief.
Sławomir Fudala
Autor dwujęzyczny, piszący po polsku i śląsku. Tworzy wiersze, opowiadania i jednoaktówki. Tłumacz poezji na język śląski. Wielokrotnie nagradzany za fraszki i limeryki. Autor dwujęzycznego komiksu historycznego.
Skomentuj