Wystawa Serce Matki - Ewelina Szuścik
Ni ma to tako obyczajno wystawa. Óna dycki do Wóm moc coby wrócić sie spatki po zadek. Do roków, kiere uż downo minyły ale zóstawiły po sie szumne spóminki bajtlowych roków. Wózki, bety, oblyczki, lalki i starucno kolybka, to bije znómym rytmym downych czasów, kie we kszeftach było wszystko na kartki, po oblyczki sie chodzowało do Czech, a ludzie szanowali wiecy i przekazowali inszym. Dycki nie była to gańba dostać mantel po ciotce, bóty po bracie, czy wózek łod kogo z familije. Oblyczki w tamtych rokach starzały sie pospołu z człowiekiym. Każdo łata, nitka co tyrczała , czy knefel kiery odpadowoł, to wszystko ukazowało historyje wiecy i człowieka ,kiery ni mioł za wiela ale poradził szanować dar inszych.
Mamulki opatrowały ryncznie szyte bety, szkróbiły korónki i chocioż nie było pampersów jako dzisio , dbały coby dziecka miały fórt suchóm pieluche. Mandory wypyrczóne w piekne sukiynki stroiły łóżka, na kiere żodyn bajtel nie opoworził sie wylyż, bo chneda czakała go bania łod starki abo mamulki.
Wystawa kieróm żech stworziła przenosi w hańdowne roki ale i spómino czas, kie żyło sie nóm, bajtlóm eszcze bez starości i chocioż każdy z nas isto trefił na przikrótki rajtuzy ,kiere nie pozwolały na wiynkszy krok i zupe mlycznóm w przedszkolu ,to każdy spómino ty roki z łezkóm w oku i smakiym pecynka z masłym i cukrym.
Ewelina Szuścik
Poetka, pisarka, felietonistka i promotorka gwary cieszyńskiej, urodzona w Cieszynie, od lat związana z Zebrzydowicami.
Skomentuj