Ôdszoł Ślōnzŏk Alozjy Lysko
Jak pedzioł tak zrobiōł...
Wejrzoł Pōn Bōczek w bojszowskie strōny.
Kej wojna grzmiała ôklanŏ.
Dojrzoł syneczka we matki kieckach.
Ta stŏła zapłakano.
Zapłakoł z nimi nad kożdym synkiym.
Ziymiōm co ich zrodziła.
Nad ich dziedzictwym, gŏdkōm, tradycyjōm
Co z niyj czerpali siła.
A ty Alojzku mōm cie na ôku.
Ty bydziesz rychtig rechtorym.
Co mo we zŏcy ta ôjcowizna.
Dlŏ młodych bydziesz wzorym.
Pozbiyrosz ziŏrka te rozciepane.
Ślōnskij tradycji i gŏdki.
Co by niy uschły kaś tam na miedzy .
Dlo Twōji ślōnskij czelodki.
Ôbudzisz śpiōnce bojszowskie duchy.
Pistulki i inksze Herody.
Co w chałpach zŏwdy bajtli straszyli.
Sōm bōł żeś kiedyś młody.
Pośla tam do Cia, anielskie chóry.
Szprymy niych pochytajōm.
Niych mi po szkole przilecōm nazŏd.
Niych mi po ślōnsku śpiywajōm.
Pokŏżesz wszystkim wasza historio.
Ciynżko wōm było pierōnsko.
Ale piyknyjszyj zdo sie niy znojda.
Piyknŏ jest Wasza ślōnskŏ.
Niych sie dowiedzōm we kożdych strōnach.
To byli nasi ojcowie.
W kożdym żywocie tyla jest prŏwdy.
Zawresz to w piyknym słowie.
Obudzisz duchy, wiysz - Duchy wojny.
A niych je kożdy zobŏczy.
Z Hankōm żech gŏdoł, ôna im powiy.
Że im sie spocōm ôczy.
Nauczysz przŏnio i forsztelunku.
Sōmsiadōw tych co za miedzōm.
I nŏs Ślōnzŏkōw rozumieć siebie.
Niych wszyscy o tym wiedzōm.
---
Terŏz ôstały nōm na tym Ślōnsku
Słowa spisane, gŏdane.
Wielkŏ ta zŏca iże bōłś z nami
Tajla sam Twoja ôstanie.
Sławomir Fudala
Autor dwujęzyczny, piszący po polsku i śląsku. Tworzy wiersze, opowiadania i jednoaktówki. Tłumacz poezji na język śląski. Wielokrotnie nagradzany za fraszki i limeryki. Autor dwujęzycznego komiksu historycznego.
Skomentuj