Werkcojgi z falbanku
Na falbanku przi robotach, durś gŏdajōm o gupotach.
Durś się wadzōm, ôsprŏwiajom jak żŏdnego niy ma.
Posłuchejcie co tam słychać w werkszteli Achima.
Szraubki z szajbkōm i muterkōm, sōm tam chyba cztyry.
Leżōm trocha zaruściałe kole biksy szmyry.
Jedna padŏ, wiycie dziołchy kogo mōm na ôku?
Niy rolcanga, niy szraubyncjer. Kochōm sie w krokwioku.
Szmyrgiel, szrauber i krajzyga durś sōm pozwyrtane.
Zaś te cwingi ze szraubsztokym majōm pochytane.
Szwajsmaszyna tyż pochyto, ino erda chyci.
Bez szwajsbryli niy dosz rady tak pierōnsko świyci.
Linijorze z myjtermasym patrzōm za colsztokym.
Jak to majster na falbanku łōmie tym borŏkym.
Do tyj cechy weź se chopie winkel, a sziblera.
Sztrich se szczelisz ze rajznadle i klupniesz w kernera.
Kole szpindu kalfas sapie o kibel ôparty.
Durch je borŏk ôpyrskany z miszōngu i malty.
Rajbetka do pucu durś se robi jajca.
Ze walca we kwiŏtki. Na co kōmu walca?
Szalter, szteker i sztekdōuza tak se ôsprowiajōm.
Kogo byrny we krōmlojtrze barzi w zŏcy majōm.
Dyć gwintami się tykajōm byrny i fasōngi.
Coby co niy napochali, mōmy zicherōngi.
Trichter, cifus z jednōm nogōm, potargano plaua.
Raszpla chwŏli sie sztalbysztli co ôna drŏpała.
Majzel z motkym sie zgodali na jutro na ściana.
Jak kokotek, kōnsek szlauchu i staro giskana.
Achim ausgus na abfale pociōn ajzynblatym.
Ajmer, ajza, kōnsek sztangi pŏchtoł szisdratym.
Kupi Achim we markecie nowo bormaszynka.
Niy chca słyszeć jak werkcojgi ôbgŏdajōm synka.
Sławomir Fudala
Autor dwujęzyczny, piszący po polsku i śląsku. Tworzy wiersze, opowiadania i jednoaktówki. Tłumacz poezji na język śląski. Wielokrotnie nagradzany za fraszki i limeryki. Autor dwujęzycznego komiksu historycznego.
Skomentuj