Cug do rymu
Cug do rymu
Jedyn rechtor to był majster
bo do rymów mioł wihajster.
Mioł we zocy ślónski słowa
Nie chcioł jich do kapsy chować.
Roz napisoł :
Gacopiyr ,to mysz co loto.
Barzina, to dycki błoto.
Corek w nim hazoki siedzióm,
ćwikle ćkajóm, a nie jedzóm.
Ćma je w nocy, a guptoki
To pospołu bydóm ćmoki.
Słodko zupa to je bryja
Straszno burza - sumeryja.
Harynek to je śledź słóny
Zafuczany - obrażóny
Na wilije je goiczek
Autobus to nieskorniczek
Utopce zaś w plosie siedzóm
„Chudóm Jewe” rade jedzóm.
Błecha żere w budzie Burka
Porwóz to je kónsek sznurka.
Nieuczesany, to je strzapaty
Gruby człowiek to bachraty.
Wańtuch to je dycki brzuch
Bebok może to być duch,
Pociąg to je dycki cug
Zaś gebyno to je dług.
Plotkara to dycki tekla
A skarpeta to fusekla…
Pisze rechtor, nie wiy czymu
Skónd mo taki cug do rymu?
Dropie czepań, wkłodo bryle
Bo tych słów je dycki tyyylee!!!
Siednył borok myśl mu brzdynkła
- ta kapsa by dycki pynkła!
Papiyr słowa uratowoł
I dlo inszych ich zachowoł.
Spamiyntoł ty Ślónski słowa
A nóm trzeja ich szanować
Cug do rymu fajno wiec
Kożdy chce go dycki mieć!
Ewelina Szuścik
Poetka, pisarka, felietonistka i promotorka gwary cieszyńskiej, urodzona w Cieszynie, od lat związana z Zebrzydowicami.
Skomentuj