Chłopsko wiec - Ewelina Szuścik
Chłopsko wiec
Autor: Ewelina Szuścik
Na caluśkim świecie
Je jedna tako wiec
Co kożdy zdrowy chłop
Chciołby dycki mieć.
I choćby sie wytynżoł
To ni ma dziwota
Bo ta wiec siedzi
Fórt w czepani chłopa.
Chłopy na to prawióm
,że skorani boski.
Strasznie im to zocne
-furgajóm pogłoski.
Ku tej wiecy jak na złość
Doł Bóg też zasade
Coby chłopa dzierżeć w gorści
Dociepoł też babe.
Ale wiycie roztomili
Z tym to uż je gorzij
Aji krampus babe pośle
Tam kaj sóm ni może.
A baby z tóm wiecóm
Chłopów ogupiajóm,
Co tam yno se wymyślóm
Z nimi wyprowiajóm.
Ta wiec po szczerości
Bywo z przodku frelki
Prawióm na to pieszczotliwie
Balóny, bómbelki.
No a baby dycki rade
Korónki, lajbiki
Ku nim maszki roztomajte
-cyckowe achtliki.
Jedne sóm nie wielki
Insze jako smoki.
Z wrzaskiym mody
Kożdo nosi cyckowe podpiyroki.
Cychaltry na poskach
Coby pieknie stoły,
A ku tymu nici w rzici
-żodne rosypoły!
Óne dycki muszóm być :
-Coby kómu syntam
nie strzelić we zymby
-Abo zaś we tańcu
nie owalić gymby.
-Abo coby balón
nie uciyk na plecy
Prziznocie,że lajbiki
To potrzebne wiece.
W tajymnicy, to wóm powiym
Cychalter, lajbik i gorset ich brat
Dzierżóm w ryzach chłopski głowy
I ich cołki chłopski świat.
Ewelina Szuścik
Poetka, pisarka, felietonistka i promotorka gwary cieszyńskiej, urodzona w Cieszynie, od lat związana z Zebrzydowicami.
Skomentuj